hava haqqindaBakı
Bu gün +34 ° C
  • USD - 1.7000
  • RUBL - 0.0272
  • EURO - 1.9336
  • NEFT - 65.27
  • clouds-weather

Abbas Lisani ilə bağlı SON DURUM: Yaxınları ilə görüşə icazə verilmir

Abbas Lisani ilə bağlı SON DURUM: Yaxınları ilə görüşə icazə verilmir

Mayın 27-dən Ərdəbil həbsxanasında  aclığa başlamış Güney Azərbaycan Milli Hərəkatının fəalı Abbas Lisani təkadamlıq kamerada  aksiyasını davam etdirir. 

Güney Azərbaycan Milli Oyanış Hərəkatı (GAMOH) İdarə Heyətinin üzvü Ağrı Qaradağlının Cebhe.info-ya verdiyi məlumata görə, Abbas Lisaninin yaxınları ilə görüşməyə imkan verilməyib. Həbsxana rəhbərləri bildirib ki, buna icazə yoxdu. Onların sözlərinə görə, fəal aclıq aksiyasını dayandırmayana qədər onunla ailəsi arasında heç bir görüşə icazə verilməyəcək. 

Lisani ailəsi iyunun 11-də, fəalın aclıq aksiyasının 16-cı günündə həbsxana rəhbərliyinə müraciət etdikləri zaman belə bir cavabla qarşılaşıblar. Zindan məsulları aclıq aksiyası keçirilən müddətdə vəziyyətin dəyişməyəcəyini dəfələrlə vurğulayıb. Abbas Lisani iyunun 10-da Ərdəbilin İnqilab Məhkəməsinin 1-ci şöbəsində mühakimə olunub. Fəal aclıq aksiyasının 15-ci günündə onlarla polis və mülki geyimli ETTELAAT əməkdaşlarının əhatəsində əl-ayaqları qandallı şəkildə məhkəməyə aparılıb. Hakim Xudadadinin sədrliyi ilə keçirilən məhkəmə iclasında prokurorun müavini və fəalın vəkili cənab Fəqihi də iştirak edib, məhkəmə prosesi 4 saatdan çox davam edib. Fəalın səhhəti ağrıdır, onun təxminən 20-25 kq arası çəki itirdiyi bildirilir. Abbas Lisani məhkəmə tərəfindən irəli sürülən bütün ittihamları rədd edərək bu prosesi Azərbaycanda gedən milli-mədəni hərəkatı radikal göstərməyə yönəlmiş bir ssenarinin davamı olduğunu bildirib. Tanınmış fəal Təbriz İnqilab Məhkəməsində təhlükəsizlik qüvvələri tərəfindən saxlanmasının qanunsuz olduğunu deyib. O ailəsi, vəkili və prokurorun nümayəndəsinin tələbinə rəğmən aclıq aksiyasını davam edəcəyini də vurğulayıb. 

Qeyd edək ki, Abbas Lisani yanvarın 15-də məhkəmə iclasına qatılmaq üçün müraciət etdiyi Təbriz İnqilab Məhkəməsinin 2-ci şöbəsində yoxa çıxıb. Fəalın ailə üzvləri və azərbaycanlı fəallar səlahiyyətli orqanlara müraciət edib araşdırdıqdan sonra onun təhlükəsizlik və məhkəmə orqanlarının birgə tədbiri ilə Ərdəbilə aparıldığı məlum olub. O təxminən 5 aydır ki, Ərdəbil zindanında qeyri-müəyyən vəziyyətdə saxlanılır. Tanınmış fəal məhkəmə prosesində özünü müdafiə etmək üçün vəkili tərəfindən hazırlanıb zindana verilən dosyenin xülasəsi ona təhvil verilməməsinə etiraz olaraq mayın 27-də aclıq aksiyasına başlayıb. Abbas Lisani uzun illərdir ki, Azərbaycan türk millətinin demokratik və milli hüquqları uğrunda mədəni mübarizə aparır. Şəffaf və dinc mübarizəsi ilə seçilən fəal dəfələrlə təhlükəsizlik qüvvələri tərəfindən saxlanılıb, uzun illər həbs olunub və müxtəlif təzyiqlərə məruz qalıb.

Aydın
Cebhe.info


Oxunma sayı: 1002