hava haqqindaBakı
Bu gün +22 ° C
  • USD - 1.7000
  • RUBL - 0.0265
  • EURO - 1.8907
  • NEFT - 59.56
  • clouds-weather

Vergidən yayınanlar cəzalandırılıb – Siyahıya alınan əmlakların sonrakı aqibəti necə olacaq? – Açıqlama

Vergidən yayınanlar cəzalandırılıb – Siyahıya alınan əmlakların sonrakı aqibəti necə olacaq? – Açıqlama

Vergilər Nazirliyi tərəfindən dövlət büdcəsinə yaranmış borcla bağlı 3 vergi ödəyicisinin əmlakı siyahıya alınıb. 

Nazirlikdən bildirilir ki, Bakı şəhəri Lokal Gəlirlər Baş İdarəsində qeydiyyatda olan 3 vergi ödəyicisinin dövlət büdcəsinə yaranmış 491 min 684 manat dəyərində vergi borcu ilə bağlı əmlakı siyahıya alınıb.

Çıxarılmış qərarlara uyğun olaraq, 2 vergi ödəyicisində 472 min 915 manat dəyərində vergi borcuna görə əmlakın siyahıya alınması tədbirləri həyata keçirilib və ümumilikdə 505 min 200 manat dəyərində əmlak siyahıya alınıb.

Vergi orqanları tərəfindən Bakı şəhəri, Nizami rayonu, Rüstəm Rüstəmov küçəsi, 72A ünvanda yerləşən, "Park City" Məhdud Məsuliyyətli Cəmiyyətinə məxsus tikilidə əmlakın siyahıya alınması tədbirləri həyata keçirilib, 457 min 433 manat vergi borcu müqabilində 480 min manat məbləğində əmlakı (obyekti) siyahıya alınıb.

Bakı şəhəri, Nərimanov rayonu, 2095-2096-ci məhəllə ev 9c, 507-ci küçədə yerləşən "Azərkimya İstehsal və Xarici İqtisadi Əlaqələr" Açıq Səhmdar Cəmiyyətinə məxsus mebel sexi və beton sexinin fəaliyyəti araşdırılarkən, onun 15 min 482 manat məbləğində vergi borcunun yarandığı müəyyən edilib. Bu barədə vergi ödəyicisinə bildiriş göndərilsə də, borc məbləği qanunvericilikdə nəzərdə tutulan müddətdə ödənilməyib. 
Yaranmış vergi borcunun ödənilməsini təmin etmək məqsədilə obyektdəki əmlakın siyahıya alınması haqqında qərar çıxarılıb, 25 min 200 manat dəyərində dəzgah və digər avadanlıqlar müvafiq qaydada siyahıya alınıb.

Bundan əlavə fiziki şəxs Hüseynov Alqayıt İlham oğlunun dövlət büdcəsinə yaranmış 18 min 767 manat borcuna görə əmlak siyahıya alınması barədə qərar çıxarılıb. Lakin nəzarət tədbiri zamanı vergi ödəyicisi tərəfindən borc məbləğinin tam şəkildə büdcəyə ödənilməsini təsdiq edən sənədlər təqdim edildiyindən, onun barəsində əmlak siyahıya alınma tədbirləri həyata keçirilməyib.

Vergilər Nazirliyi vergi ödəyicilərinin nəzərinə çatdırıb ki, vergi öhdəliklərini tam həcmdə və vaxtında yerinə yetirməyən, o cümlədən vergini hesabatda göstərilməli məbləğə nisbətən azaldan və büdcəyə ödənilməli vergi məbləğini hesabat təqdim etməməklə vergidən yayınan şəxslərə qarşı qanunvericiliklə müəyyən edilmiş maliyyə sanksiyaları və digər məsuliyyət tədbirləri tətbiq edilir. Vergi orqanları belə halların qarşısının alınması istiqamətində tədbirləri davam etdirəcək.

Maraqlıdır, vergi öhdəliklərini yerinə yetirməyənlərlə bağlı hansı tədbirlər görülür? Siyahıya alınan obyekt və əmlaklarla bağlı hansı qərarlar verilir? 

Vergi məsələləri üzrə ekspert Emin Səttarov Cebhe.info-ya açıqlamasında bildirib ki, Vergilər Məcəlləsinin 89 və 90-cı maddələrində bu məsələ öz əksini tapır:

“89-cu maddə əmlakın siyahıya alınması ilə bağlıdır. Bu maddəyə görə, vergi əməkdaşları istədikləri əmlakı siyahıya ala bilməzlər. Mütləq qaydada ardıcıllıq gözlənilməlidir. Yəni ilkin mərhələdə istehsal prosesinə, sahibkarın işinə mane olmayan avadanlıqlar siyahıya alınmalıdır. Bundan sonra isə vergi orqanının vəzifəli şəxsi istehsal və ya alqı-satqı obyektidirsə, orada istifadə olunan avadanlıqları siyahıya ala bilər.

Bundan sonra ödənişin həyata keçirilməsi üçün 30 gün vaxt verilir və həmin müddət bitdikdən sonra ödəniş edilmədiyi təqdirdə əmlakın hərraca çıxarılacağı barədə xəbərdarlıq edir. Bu da Əmək Məcələsinin 90-cı maddəsi ilə tənzimlənir. Bunun üçün ixtisaslaşdırılmış hərrac təşkilatlarına müraciət edilir”.

Xatirə Nəsirova
Cebhe.info


Oxunma sayı: 936